Lev 22 | NdeIBE | STEP | UJehova wathi kuMosi,

Leviticus 22

1 UJehova wathi kuMosi, 2 “Tshela u-Aroni lamadodana akhe bahloniphe iminikelo aba-Israyeli abayinikela kimi ukuze bangahlambazi ibizo lami elingcwele. Mina nginguJehova.

3 “Batshele ukuthi, ‘Kuzo zonke izizukulwane ezizayo nxa ekhona ozabe engahlanzekanga ngokomkhuba kodwa ajinge asondele eminikelweni engcwele aba-Israyeli abayikhethela uJehova, lowomuntu kasuswe ebusweni bami. Mina nginguJehova.

4 “ ‘Nxa owenzalo ka-Aroni elesifo sejwabu esithelelwanayo kumbe ephihlika ubovu emzimbeni, kangadli iminikelo engcwele aze aqale ahlambuluke. Uzabe esengcolile njalo angabamba okungcoliswe yisidumbu loba athintane lomuntu ovuza ubudoda, 5 longabe athinte loba yini enwabuzelayo emenza angcole, loba kungumuntu omenza angcole kungakhathalekile ukuthi yikungcola bani.

6 Lowo othinta loba yikuphi kwalezi izinto uzabe esengcolile kuze kube kusihlwa. Kangadli loba yini eyeminikelo engcwele ngaphandle kokuba eseqale wageza ngamanzi. 7 Ilanga lingatshona uzabe esehlanzekile, lapho-ke usengadla iminikelo engcwele ngoba iyikudla kwakhe.

8 Kangadli lutho oluzifeleyo loba olubulewe ngezinye izinyamazana zeganga ngoba lokho kungamngcolisa. Mina nginguJehova.

9 “ ‘Abaphristi kabagcine izimiso zami ukuze bangabi lecala bafe ngenxa yokuzeyisa. Mina nginguJehova obenza babengcwele.

10 “ ‘Akulamuntu ongasuwendlu yomphristi ovunyelwa ukudla umnikelo ongcwele, kanye lesethekeli somphristi kumbe isisebenzi esiqatshiweyo; bonke bangawudli. 11 Kodwa aluba umphristi ethenga isigqili ngemali, loba isigqili singesizelwe emzini wakhe lesosigqili singakudla ukudla kwakhe. 12 Aluba indodakazi yomphristi ithathwa yindoda engasumphristi kayingadli loba yisiphi isipho esingcwele. 13 Kodwa uma indodakazi yomphristi isiba ngumfelokazi loba ixotshiwe ekwendeni ingelamntwana ibisibuya izohlala ekhaya kwabo njengasebutsheni bayo, ingakudla ukudla kukayise; kodwa ongafanelanga kangakudli.

14 “ ‘Uma umuntu angadla umnikelo ongcwele ngokungazi kumele ahlawule kumphristi abuye engeze ingxenye yesihlanu yalokho kudla.

15 Umphristi kangangcolisi iminikelo engcwele elethwa ngaba-Israyeli kuJehova 16 ngokubavumela ukuthi bayidle iminikelo leyo, bese besiba lecala okumele balihlawule. Mina nginguJehova obenza babengcwele.” ’

Imihlatshelo engemukelekiyo

17 UJehova wathi kuMosi, 18 “Tshela u-Aroni lamadodana akhe labo bonke abaIsrayeli uthi loba ngubani wabo, um-Israyeli loba owezizweni ohlala ko-Israyeli elethe isipho somhlatshelo kuJehova egcwalisa isifungo loba umnikelo wokuzithandela 19 kalethe isifuyo esiduna esingelasici esingaba yinkomo, imvu kumbe imbuzi ukuze yamukeleke ukumela wena. 20 Lingalethi lutho olulesici ngokuba aluzukwemukelwa ukulimela. 21 Nxa omunye ekhetha emhlambini wakhe umnikelo wobuzalwane ewuletha kuJehova ukugcwalisa isifungo esithile kumbe umnikelo wokuzifunela lesosifuyo asingabi lasici landawo esolekayo kuso ukwenzela ukuthi samukeleke.

22 Linganikeli ngezifuyo eziyiziphofu ezilimeleyo leziyizilima loba yini elensumpa kumbe izilonda eziphihlikayo. Lezi lingazibeki phezu kwealithare ukuba ngumnikelo wokutshiswa kuJehova. 23 Kodwa umnikelo wokuzifunela ungaba yinkomo kumbe imvu eyisilima loba engakhulanga yaphelela, kodwa ingeke yamukeleke ukugcwalisa isifungo. 24 Linganikeli kuJehova isifuyo esathenwa ngokuxhokolwa, ngokugxotshwa loba ngokudatshulwa amasende. Lingakwenzi lokho elizweni lakini,

25 njalo lingazemukeli izifuyo ezinjalo kwabezizweni bese linikela ngazo zibe yikudla kukaNkulunkulu wenu. Aziyi kwamukeleka ukulimela ngokuba zigogekile zilezici.”

26 UJehova wathi kuMosi,

27 “Ithole elizelweyo loba izinyane lemvu kumbe elembuzi kalihlale kunina izinsuku eziyisikhombisa. Kusukela esukwini lwesificamibili selisamukeleka ukuba ngumnikelo wokutshiswa kuJehova.

28 Inkomokazi loba imvukazi ayingahlatshwa langa linye lomntanayo.

29 “ ‘Nxa linikela umhlatshelo wokubonga kuJehova wunikeleni ngendlela eyamukelekayo ukulimela. 30 Kayidliwe mhlalokho, lingatshiyi lutho lwayo kuze kuse ngakusasa. Mina nginguJehova.

31 “Gcinani imilayo yami liyilandele. Mina nginguJehova.

32 Lingangcolisi igama lami elingcwele. Aba-Israyeli kabangazi ngokuthi ngingcwele. Mina nginguJehova olenza libe ngcwele, 33 yena owalikhupha eGibhithe ukuba abe nguNkulunkulu wenu. Mina nginguJehova.”